महिला लक्षित कार्यक्रमको रकम सडकमा, रकम अभावमा सेफ हाउस अलपत्र

धादिङ ।हिंसामा परेका महिलाहरुको लागि सुरक्षा दिने उद्देश्यले सुरु गरिएको सुरक्षित आवास गृह (सेफ हाउस) भवन आर्थिक अभावका कारण निर्माण कार्य रोकिएको छ ।
भुरलीभञ्ज्याङ गाविस वडा न.ं ३ हनुमान मन्दिर नजिक निर्माण सुरु गरिएको आवास गृह भवन आर्थिक अभावको कारण अलपत्र परेको हो ।

३० लाखको लागतमा गत वर्ष ०६७ जेठ महिनाबाट निर्माण कार्य सुरु भएको भवनमा हालसम्म ४ लाख रुपैयाँ खर्च भएको महिला मानवअधिकारकर्मी एवं् भवन निर्माण समितिका अध्यक्ष राधिका सापकोटाको भनाई छ । आर्थिक वर्ष ०६६÷६७ मा जिल्ला विकास समिति धादिङले भवन निर्माणको लागि ४ लाख रुपौयाँ सहयोग गरेपछि भवन निमार्ण कार्य सुरु गरेपनि रकम अभावको कारण बिचैमा छोड्नु परेको अध्यक्ष सापकोटाले गुनासो गर्नुभयो ।
जिविसले महिलाको लागि छुट्याएको रकम समेत अन्यत्र सडकहरुमा खर्च गरेको र आ.व.२०६७÷०६८ मा हिंसा पीडित रातहकोषबाट छुट्याएको रकम निर्देशिका विना खर्च गर्न नमिल्ने भन्दै रकम नदिएपछि निर्माण कार्य रोकिएको उहाँले बताउनुभयो ।
आ.व.०६७÷६८ मा महिला लक्षित कार्यक्रम अन्तरगत जिविसले रिङ्रोडको लागि १६ लाख र तसर्पूको सकड निर्माणमा ८ लाख खर्च गरेको थियो । तर महिलाका लागि सुरक्षा घर बनाउन लाग्दा समेत जिविसले रकम उपलब्ध नगराएकोमा महिलाअधिकारकर्मीहरु आक्रोसित भएका छन् ।
अहिले जिल्लामा ४ जनासम्म महिलाहरु दैनिक रुपमा हिंसामा परेर सदरमुकाम आउने गरेका छन् भने ८ जनासम्मलाई महिनामा सुरक्षित रुपमा राख्ने गरेको महिला मानवअधिकारकर्मीहरुको भनाइ छ ।
‘‘अहिले उनीहरुलाई सदरमुकाम कै विभिन्न होटलहरुमा राख्दै आएका छौं । हिंसा पीडित सहयोग कोष निर्माण गरेर ५÷१० रुपैयाको दरले उठाएको पैसाले होटलको खर्च धानेका छौं । अब त त्यहि पनि सकिन लागेको छ ।’’ महिला मानवअधिकार रक्षकहरुको जिल्ला संजाल धादिङका अध्यक्ष अम्बिका रुपाखेती बताउनुहुन्छ ।
सुत्केरी महिलाहरुलाई संरक्षण दिनु पर्दा अलि बढि खर्च लाग्ने र एक जनाको लागि १६ हजारसम्म खर्च लागेको महिलामानवअधिकार रक्षक सञ्जालको अनुभव छ ।
आर्थिक अभावले निर्माण कार्य रोकिएको भवन निर्माण पुरा गर्नको लागि जिल्ला विकास समितिले आ.व. ०६७÷६८ को महिला सशक्तिकरणको रकमबाट ७ लाख रुपैया दिने निर्णय गरेको छ । युनाइटेड मिसन टु नेपालले पनि ३ लाख रुपैया सहयोग गर्ने जनाएको छ ।
३० लाखको रुपैयाँको लागतमा निर्माण गर्नुपने भवन निर्माणको लागि जिविसले ४ लाख रुपैयाँ खर्च गरेको छ । आगामी वर्ष ७ लाख दिने भनेको छ युएमएनले दिने ३ लाख रुपैयाँ उपलब्ध गराउने जानाकारी दिएकोले १४ लाख जम्मा हुने देखिन्छ । यो रकमले सुरक्षित आवास गृह बन्छ त ? महिलाअधिकारकर्मी मुना एवं भवन निर्माण उपभोक्ता समितिका कोषाध्यक्ष मुना भट्ट प्रश्न गर्नु हुन्छ ।
‘जेष्ठ महिनाबाट सुरु भयो असारको अन्तिमतिरबाट निर्माण कार्य रोकियो, अहिले पिल्लरमात्रै देखिन्छ’ ।
जिल्ला सदरमुकाम धादिङबेशी नजिकै रहेको उक्त स्थानमा सामुदायिक वनले भवन निर्माण गर्नको लागि ६ आना जग्गा निःशुल्क उपलब्ध गराएपछि निर्माण कार्य सुरु भएको थियो ।