धादिङ, भदौ १ – जिल्ला प्रशासन कार्यालय धादिङबाट ५२ थान राहदानी हराएको
सार्वजनिक भएको छ । मेसिन रिडेबल राहदानीको प्रयोग सुरु भएपछि स्टोरमा
थन्काएर राखिएको राहदानीमध्ये ५२ थान स्टोरभित्रैबाट हराएको प्रमुख जिल्ला
अधिकारी बेदप्रसाद खरेलले बताउनुभयो ।
जिल्ला प्रशासन कार्यालयको अभिलेख अनुसार कार्यालयको स्टोरको दराजभित्र
राखिएका ४८२९३०१ देखि ४८२९३५० सम्मका ५० थान र ४८२९५३४ र ४८२९५३५ नं का दुई
थान गरी ५२ थान हस्तलिखित राहदानी हराएको हो ।
राहदानी हराउनुमा कर्मचारीकै लापरवाही रहेको जिल्ला प्रशासन कार्यालयले
ठहर गरेको छ । गएको साउन २७ गते नयाँ भवनमा कार्यालय सार्ने क्रममा पुराना
सामानहरु जाँच गर्दा राहदानी हराएको पुष्टि भएको हो । तर राहदानी कहिले र
कसरी हराएको हो भन्ने बारेमा भने केहि खुल्न सकेको छैन ।
राहदानी हराएको पुष्टि भएपछि सहायक प्रमुख जिल्ला अधिकारी विजय पौडेलको
संयोजकत्वमा गठिन छानबीन समितिले कर्मचारीकै कारण राहदानी हराएको निष्कर्ष
सहितको प्रतिवेदन प्रमुख जिल्ला अधिकारीलाई बुझाईसकेको छ ।
हराएको राहदानीको विवरण सहितको पत्र गृह मन्त्रालय, क्षेत्रीय प्रशासन
कार्यालय र अध्यागमन विभागमा पठाइएको र दुरुपयोग हुनसक्ने तर्फ सचेतता
अपनाईएको जिल्ला प्रशासन कार्यालयले जनाएको छ । राहदानीको जिम्मा लिएका
बद्रि थापाले नयां भवनमा कार्यालय सरेपछि स्टोरको एउटा चाबी नै फिर्ता
नगरेको लिखित जानकारी आएपछि कार्यालयले थापालाई निगरानीमा राखेर अनुसन्धान
शुरु गरेको छ ।
तत्कालीन स्टोरकिपर थापालाई निगरानीमा राखिएपनि कार्यालयवाट राहदानी कहिले
र कसरी हराएको हो भन्ने बारेमा भने केहि खुल्न सकेको छैन । थापाले आफुले
कुनै बदमासी नगरेको दावी गर्नुभएको छ ।
No comments:
Post a Comment