चट्याङ लागेर दुईको ज्यान गयो, ७ घाइते

धादिङ, भदौ १ –  विहीवार साँझ चट्याङ लागेर धादिङको उत्तरी भेगमा पर्ने बुढाथुम र गुम्दी गाविसमा २ जनाको ज्यान गएको छ । ७ जना घाइते भएका छन् । साँझ साँढे ५ वजेतिर चट्याङ लागेर बुढाथुम गाविस ३ आलथोककी ३४ बर्षिया रिता गुरुङको ज्यान गएको हो ।

यसैगरी चैनपुर गाविस घर भई चिम्चोक निमावि गुम्दीका शिक्षक तोयानाथ लोहनीको पनि बिद्यालयवाट फर्कदा चट्याङ लागेर ज्यान गएको जिल्ला प्रहरी कार्यालय धादिङले जनाएको छ ।

चट्याङ लागेर बुढाथुममा ६ जना र मूलपानी गाविसमा १ जना घाइते भएका छन् । गम्भीर घाइते बुढाथुमकी नन्दमाया अधिकारीलाई उपचारका लागि काठमाडौं लगिएको छ भने अन्यको स्थानीय स्वास्थ्य चौकीमा उपचार भइरहेको प्रहरीले जनाएको छ ।

चट्याङले तीन वटा घरमा क्षति पनि पुर्‍याएको छ । धादिङमा बुधवार साँझमा पनि चट्याङ लागेर एक जनाको ज्यान गएको थियो भने एक जना घाइते भएका थिए । केहि बर्षयता धादिङ जिल्लामा चट्याङ लागेर ज्यान जानेको संख्या बढ्न थालेको छ ।