धादिङले २५ प्रतिशत थप अनुदान पाउने

धादिङ, साउन ३१ – न्यूनतम कार्यसम्पादनका अधिकांश शर्त पुरा गरेका कारण जिल्ला विकास समिति धादिङले स्थानीय विकास मन्त्रालयबाट थप २५ प्रतिशत अनुदान रकम पाउने भएको छ । न्यूनतम शर्त तथा कार्यसम्पादन मापनमा आर्थिक बर्ष २०६७/६८ मा  जिल्ला विकास समिति, धादिङले कुल ६५ अङ्क प्राप्त गरेकाले थप अनुदान पाउने भएको धादिङका आन्तरिक लेखा परीक्षक हरि पाटामगरले बताउनुभयो ।

आर्थिक वर्ष २०६४/६५ मा न्यूनतम शर्त तथा कार्यसम्पादनमा ९३ प्रतिशत अंक ल्याएर धादिङ देशभरिकै पहिलो बन्न सफल भएको धादिङको स्तर त्यसयता दुईवर्ष  खस्किएको थियो । जिल्लाका पचास गाविसमध्ये त्रिपुरेश्वर, धुषा, तिप्लिङ र मुरलीभञ्ज्याङ गाविस  भने आर्थिक वर्ष २०६७/६८ मा न्युनतम शर्तमा अनुत्तिर्ण भएका छन् ।

स्थानीय निकायको कार्यसम्पादनलाई चुस्तदुरुस्त र प्रभावकारी स्थानीय विकास मन्त्रालयले सात सूचकहरुका आधारमा मूल्याङ्कनको मापदण्ड तय गरेको छ ।

स्थानीय स्वायत्त शासन ऐन, २०५५ को दफा १४८ मा स्थानीय निकायको कार्यसम्पादन चुस्त, दुरुस्त र प्रभावकारी बनाउन सुरु गरिएको यो प्रणालीअनुरुप ३६ देखि ६० अङ्क ल्याउने जिविसको अनुदान यथावत रहने, ६० देखि ८० अङ्क ल्याउने जिविसको अनुदान २५ प्रतिशत थप हुने र ८० प्रतिशतभन्दा बढी अङ्क ल्याउनेलाई ३० प्रतिशत थप अनुदान दिइने व्यवस्था रहेको छ ।