बालिका बलात्कारको आरोपमा एकीकृत माओवादी नेता गिरफ्तार

धादिङ । वैशाख ८ गते

मैदी गाविस-४ काफलपानीकी १५ वर्षीया एक बालिकालाई बलात्कार गरेको आरोपमा एकीकृत माओवादी नेतालाई ०६९ वैशाख ८ गते प्रहरीले गिरफ्तार गरेको छ । एकीकृत माओवादी मैदी गाउँ सेक्रेटरी ४२ वर्षीय लालबहादुर कार्कीले एक बालिकालाई वैशाख २ गते बेलुका बलात्कार गरेको आरोपमा प्रहरीले उनलाई पक्राउ गरेको हो । कार्कीले बालिकालाई घरमा सुतेको ठाउँबाट बोलाएर बाहिर लगी बलात्कार गरेको पीडित पक्षले जनाएको छ । बालिकाले परिवार र छिमेकीलाई घटना बताएपछि कार्कीलाई स्थानीयको सहयोगमा प्रहरीले पक्राउ गरेको हो । पीडित पक्षले प्रहरी चौकी मैदीमा पटकपटक जानकारी दिएको भएपनि कानूनी कारबाहीको प्रकृयामा प्रहरीले ढिलाई गरेको पीडित पक्षले आरोप लगाएको छ । आरोपितलाई जिल्ला प्रहरी कार्यालयले गिरफ्तार गरी हिरासतमा लिएको छ । घटनाका सम्बन्धमा कार्कीले घटना प्रमाणित भए आफु कारबाही भोग्न तयार रहेको बताएका छन् । मैदी प्रहरी चौकीमा आइपुगेका पीडित बालिकाले आफूलाई घरबाट बाहिर लगी कार्कीले वैशाख २ गते बेलुका बलात्कार गरेको बताइन् ।